Eu guard da posar bain tanter las cuorsas
Eine Minute vermittelt keine Sicherheit

30.12.2008 by nip | 6687 Views | 0 Kommentare | | Blog, Rumantsch | E-Mail

Ils resultats da Dario Cologna sun stats uschè excellents ch’el s’ha rechattà davo las cuorsas da Tavo a la testa dal classamaint intermediar da la Coppa mundiala da passlung. Dürant la posa da mezdi tanter seis trenamaints ha’l tut peida per respuonder ad ün pêr dumondas da l’ANR.

Il prossem böt da Dario Cologna es d’avair success pro la “Tour de ski”
CUN DARIO COLOGNA HA DISCURRÜ MARIO PULT / ANR
ün'intervista fatta cuort davo las cuorsas da Tavo

Che sentimaint es quai dad esser il meglder passlunghist actual dal muond?
Eu nu’m saint amo sco meglder passlunghist dal muond ma id es ün bel sentimaint dad esser davo ses cuorsas i’l prüm rang da la coppa mundiala.

Ha’L sömgià üna jada da pudair portar la chamischa gelgua?
Schi, quai tocca pro ün da meis böts. Eu nu vess però cret cha quai capita uschè svelt.

Es El stat surprais da ragiundscher ün ottavel rang illa cuorsa da stil classic a Tavo?
Meis böt d’eira da gnir tanter ils prüms desch, id es stat üna super-cuorsa.

Che preferischa El, il stil classic o’l stil da patin?
Quai es greiv dir, ils resultats da las cuorsas da skating sun stattas fin uossa meglders. Ma ir classic es eir üna bella tecnica. I dependa eir ün pa da las relaziuns perche cha schi’d es bel fraid esa plü simpel per tschairar.

Chi tschaira vairamaing ils skis?
Minchün da no ha ün agen „Servicemann“ ed insembel tschernaina il meglder ski, davo avair fat ün pêr tests.

Co s’ha’L remiss davo la cuorsa da sonda per la sfida da dumengia?
Eu n’ha guardà da cuorrer oura bain, n’ha mangià bain e n’ha stendü las chommas in ot. A bunura suna i a cuorrer amo ün pa.

Nu Til haja parü cha’ls Norvegiais Til hajan bloccà aint il final?
Schi, ün païn. Ma quai capita uschè svelt ed es ün pa tigna. Id es puchà ma minchün voul esser davantvart, tuots nun han plazza e lura capitan da quists incidaints.

Daja vairamaing üna tactica pro talas cuorsas?
Schi, quai daja. Eu d’eira fin pro l’ultim chant seguond e vairamaing in üna buna posiziun. Puchà ch’eu sun gnü bloccà.

Co as declera’L ch’El es davantvart pro las cuorsas lungas e cuortas?
I dependa da las premissas. Id es simplamaing d’avair avuonda forza ed üna buna fuorma.

Ha quai üna influenza schi sun spectatuors indigens sper la loipa?
Dürant la cuorsa vairamaing brich. Ma avant e davo esa bel schi’d es glieud chi’s cugnuoscha, pustüt schi’d es uschè dastrusch sco a Tavo.

Sia stagiun ha cumanzà stupend. Che fa’L per tgnair la fuorma excellenta?
Eu nu’m fetsch blers impissamaints sur da quai. Eu guard da posar oura bain cun quai ch’eu n’ha fat fingià diversas cuorsas. Lura guarda da trenar bain per esser fit per la Tour de ski.

S’ha müdà il trenamaint daspö cha vus vais il nouv trenader norvegiais?
Vairamaing nu s’ha müdà bler, forsa pro’ls trenamaints d’intervals. Id es amo adüna da trenar bler.

Es ün tal müdamaint da trenader pustüt ün factur psicologic?
In mincha cas. Cul vegl trenader n’haja lavurà dürant ses ons e vaiva üna fich buna relaziun. Da far ün müdamaint es sgüra stat bun. Il trenader nouv ha gronda experienza e pustüt pro la tecnica classa vaina fat ün bun pass inavant.

In Norvegia füss El ün grond star, in Svizra na amo. Disturba quai?
Na, gnanca zich. Quai nun es meis böt principal. Sch’eu fetsch buns resultats vegna automaticamaing plü cuntschaint.

El es ambaschadur rumantsch. Pensa’L minchatant a quai?
In mincha cas, ma brich dürant la cuorsa.

Che pensa’L vairamaing dürant la cuorsa?
Nüglia bler. Eu prouv d’esser concentrà pustüt schi va pels gods aint e stübg adüna be ingio ch’eu pudess guadagnar amo temp.

Güda ad El schi vain clomà adüna darcheu il temp?
Quai dà motivaziun pustüt schi’s es tanter ils prüms desch. I’s sa chi’d es da dar tuot a la fin perche las differenzas da temp sun suvent pitschnas.

Ha’L contact cun Seis adversaris?
Hai, hai, no discurrin adüna darcheu tanter pêr. Cun quai chi’s es magari suvent insembel vaina bun contact.

Co es l’atmosfera aint illa squadra svizra?
Quella es fich buna, perquai sun eir ils resultats uschè buns.
 

Artikel drucken