Bun saira in Engiadina, bun di a Whistler,

her nu vaina visità ingünas concurrenzas da l’olimpiada. L’ora es statta fich variada, tanter plövgia, naiv e sulai vaina gnü tuot. I’s bada l’influenza dal pazific chi’d es fich dastrusch. A bunura vaina inscuntrà la famiglia da Curdin Perl (genituors e las duos sours) ad ün café e vaina bratt’oura impreschiuns da l’olimpiada e da la bella cuntrada. Els han eir quintà cha Curdin s’haja gnü amalà e nu possa tour part als 50 km. Usché resta be amo nos Dario co ultim partecipant Svizzer a quella cuorsa.

Davò ans vaina trat aint la mandura d’inviern ed eschan its cun snow-mobiles. La guida ans ha instrui al prüm e davò vaina fat ün gir da duos uras fin sü aint in üna chamonna da skis. Id es stat üna fich bella experienza e tuots as chattaivan var 20 ons plü giuvens. Eir Ladina e Mädi han muossa las qualitats sco manaschunzas.

Davò quist “run” eschan its cun Dario a tschaina. El ha giavüschà ün “bloc charn” ed usché eschan its aint ill steak-house. Id es stat fich flot e Dario ha giodü la cumpagnia ed ils discuors in sia lingua materna, pel plü na sur da passlung. Hoz giainsa eventualmaing a verer ils bobs a quatter, scha l’ora as megldra ün poin (pel mumaint naiva e plouva). Per hoz basta.

Salüds a tuots da quels da Whistler